Viewed:3368
|
|||||||||||||||||||||||||||||||||
|
|||||||||||||||||||||||||||||||||
| |||||||||||
| [leave message] [e-card] | 
|
From: darkside (Nov 11, 2004 17:36 HKT) 琴日咁好天去完淺草同台場之後, 今日又落雨喎!!!真係有d失望… 今日又係七點半起身, 未食早餐就走去搭[JR山手線], 到達池袋之後, o係車站d商場買o左兩舊飯糰做早餐o係車o度食。今朝o既目的地係有"小江戶"之稱o既川越, 我地o係池袋轉9:05a.m.[東武東上線]o既急行列車, 大約半小時之後就到達川越站喇, 川越站唔算大, 我地出閘之後轉左, 出o左西口就會見到噴水池, 一出西口右手邊就係巡遊巴士站, 其實遊川越大至有幾個方法, 一係就行去d景點o度<不過好似話好遠>, 一係o係東口搭普通巴士, 再唔係就好似我地咁, 搭佢o既巡遊巴士遊川越, d巡遊巴士好靚架, 外型好似一架老爺van仔咁, 搭o黎架車遊川越就係幾有風味。巡遊巴士都有一日pass, 每人500yen, 張pass可以上車先買。 架巡遊巴士會兜晒川越出名o既景點, 首先會去d寺院o個邊, 其中最出名應該係喜多院, 由於我地對d寺院冇咩興趣, 所以冇落車, 不過經過見到幾古色古香, 好似都幾多o野睇, 如果鍾意寺院神社o既話都應該可以行好耐。過o左喜多院之後, 再過幾個站, 就到達藏之街喇, 我地就係o係o個o度落車。 一落車就已經見到全條藏之街兩旁都有好多大江戶時期o既屋, 全部都好特別, 好古老咁, 真係好似去o左日本o既古裝街咁, 唔怪得叫小江戶啦~~其實o黎d屋好多都係商店o黎o既, 藏之街兩旁就有好多大大小小o既商店, 有d賣o野食, 有d賣裝飾品, 不過都係賣o野食為主。落車之後首先我地行返後少少就到達時之鍾, 時之鍾係川越o既一大景點, 佢其實係一個好古老o既鐘樓, 大約兩三層樓高, 已經比附近d房屋高, 外形尚算特別, 已經唔知仲會唔會響lu, 真係可惜落雨, 唔係o既話都可以影d靚相…o係時之鐘影o左d相之後就返返去藏之街繼續感受o下雨中o既大江戶氣氛=P, 沿途都見到好多好特別o既建築, 裝飾咁, 同前幾日行大城市好唔同。行行o下我地入o左一間賣糖果o既舖頭, 佢有個閣樓, 上面擺o左好多以前製糖o既工具o係o度, 係一個小型o既博物館, 都幾得意。雖然藏之街有好多商店, 不過有好多我地都係過門而不入, 因為一來對佢賣o既o野冇興趣, 二來我地o黎川越o既目的都係睇o下d古代o既o野, 睇o下日本以前o既景觀, 我覺得就咁行下睇o下已經足夠。仲有落雨都冇咩心機行咁耐啦~哈。由藏之街一直向川越站方向行, 一直行到覺得前面冇o野睇之後就原路折返喇。 然後我地就跟住地圖o既指示去果子屋橫町喇。果子屋橫町係一條小巷, 兩邊都有d細小o既商店, 全部都係賣傳統糖果同o野食o既。其中有一間叫田中屋, 好受歡迎, 我地大約十二點去到o既時候見到已經有大批學生o係o度聚集。佢有好多好有特色o既懷舊糖果/零食賣<有d似台場一丁目商店街o個d>, 而且全部都好平, 最平10yen就有交易。田中屋隔離又有間叫玉力o既糖果店, 之前係網上睇過佢o既介紹, 佢最特別o既係佢間唔中會有師傅o係店內整糖果, 隔住玻璃就可以睇到整個整糖果o既過程, 可惜我地去到o既時候o岩o岩整完lu, 到而家都唔明點解可以由一舊好大舊, 好似泥膠咁o既糖, 搓o下搓o下就可以變成一條又長又幼o既糖, 之後仲要切開一粒粒, 每粒都有個人樣或者其他圖案添, 真係好神奇。此外, 果子屋橫町仲有間賣魚形公仔燒餅o既都好好味, 新鮮整起熱辣辣, 個皮脆脆地, 120yen一個, 好正!!! 果子屋橫町真係幾特別, 幾得意, 非常值得一去~ 我地o係果子屋橫町行o左一陣, 買o左d糖果做手信之後就o係果子屋橫町等車走喇。回程o既時候有d少意外, 就係落錯車, 以為已經到達川越站於是就落o左車, 仲走o左入個商場以為可以行去個車站o度添, 之後當然係搵唔到個站啦, 好彩當我地知道落錯車o既時候咁o岩見到遠處o既巴士站又有另一班觀光車到達喇, 於是我地就沖沖忙忙咁跳o左上車喇, 幸好買o左一日pass, 否則又要俾多程車費。 遊覽完小江戶之後, 我地就向上野進發喇, 由川越站再次乘搭[東武東上線]o既急行列車返回池袋, 跟住轉[JR山手線]就可以到達上野。我地去上o野主要都係行亞美橫丁, 亞美橫丁係一條滿佈乾濕貨o既大術<其實都唔係好闊>, 兩旁都有好多主要賣o野食o既商店, 此外亦有d係賣魚生, 海鮮, 檔舖o既人不斷大聲叫買, 就好似香港d街市咁。亞美橫丁其中有一間叫二木之果子o既舖頭, 好大間, 好似d大型超市咁, 有好多零食賣, 而且價錢亦相當便宜, 見到有o係淺草賣1000yen o既人形燒, o依o度7xx yen就買到。行o左一陣, 行到去一o度係鐵路低, o個o度有檔賣一個類似日式燒餅o既小食, 好似叫"Ameya 燒", 200yen 一個, 入面有成隻蛋, 有d菜, 上面加o左沙律醬, 熱辣辣, 非常好味架, 一定要去試o下。另外又發覺o個o度d乾貨舖好多都有得平架, 即係佢個標價好多時都mark高o左, 其中有間叫丸安<個logo有隻熊貓>, 細細間, 個老闆識講少少廣東話, 佢d帶子標價2600yen<好似係>, 不過同我地講1900yen就得, 足足平o左幾廿蚊。其他o野都會平少少俾你, 我地見佢識講廣東話, 個價錢又ok, 就買o左d帶子, 栗米米通<好好味>同芥辣魷魚乾做手信。行完亞美橫丁, 之後就兜o左出中央路慢慢向車站方向回程喇。中央路比較新式, 有唔少商場, 食店, 有Mister Donut, 又有d人稱為日版Giordano o既UNIQLO。之後去到車站附近, o個o度有間好大間o既玩具店, 叫Yamashiroya, 佢樓高六層, 每層都賣d唔同類形o野, 有好多阿Jack同三眼仔o既o野買, 於是我地又走o左入去睇o野, 仲買o左d 阿Jack o既產品添, o黎幾日睇玩具多過睇衫~哈哈。 行完Yamashiroya之後就搭[JR山手線]回巢鴨食晚飯喇。返到巢鴨, 再一次根據林小姐o既介紹, 去o左一間拉麵店食拉麵, 間舖都幾多人食, 又要排o左一陣隊先有位, 佢d拉麵好多都加o左d蒜蓉入去, 所以都幾香, 好好味, 我地一人食o左一個拉麵, 埋單約1600yen, 好飽。 之後就返民宿喇, 之前o係池袋買o左d煙花, 到o黎一刻都未玩, 已經係最後一晚了, 於是我地就拎住把遮去o左附近o既公園玩埋佢。天氣又凍, 又落雨, 我地就好似兩個傻瓜咁o係公園玩煙花, 好其實買o左好少咋, 所以好快就玩晒, 感覺上日本d煙花靚過大陸o個d喎, 有好多唔同顏色, 好靚。 玩完煙花又返返民宿, 跟住拎晒d手信出o黎, 排好晒咁影相~~哈哈。好似買o左好多o野咁, 大部分都係o野食, 一盒二盒, 一包二包…….不過執返埋之後又好似唔係好多咋喎, 其實我地算買得少架喇, 都冇掃貨, 衫又冇咩點睇, 反而食o左幾餐比較貴o既~~~ 跟住執埋d行李之後就訓lu, 聽日就要返香港lu~~~ |
|||||||||
|
|||||||||||||||||||||||||||||||||||||||